| vilecht e hüüffe mineraustoffe u gäng rächt tou vitamine d isoflavone für d ladies u öppis gäge die freie radikale zwöimau am tag es padma achtezwänzg ga loufe ga nordic walke ga aquafitte ds rote theraband© der rollertrimmer es luftchüssi es keilchüssi es phiten© armbändeli der zäiespreizer d anticouperosecreme das ma ja aus rächt u guet si aber i bitte di mir spinne doch totau we mir üüs uf die sache u sächeli feschtnagle we mir die mitteli so kolossau wichtig näme verhindere mir vorzueche dass sech üse gsung mönscheverstang mit jedem ougeblick verbessereti vilecht frage mer de o nümm nach em grund für üse schlächt luun mir mache üsi gspane abe won is doch aus wo mer gseh chönnti fröie üs juschtamänt öppis bsungers chönnti bedüte |
Copyright 2009 VITA BLUMENSTEIN, CH